مسلسل هيروز ((الابطال))

طبعا مسلسل هيروز مسلسل قوي وجبار حتى وان كان البعض لا يحبذ هالنوعية من المسلسلات الي تكون فيها الشخصيات
حاصله على طاقات وقوى غريبه وفيه خيال وخرافة فأقول لهم طالعوا هالمسلسل وان شاء الله بتحبذونها

Heroes



بطولة
Milo Ventimiglia



ويقوم بدور
Peter Petrelli
ممرض سبيكه ماشي على المباديء والقيم وليس مباديء ديننا الحنيف بل مباديء دينهم السخيف <== هذي عشان الي يهاجموني ويقولون اني ادعوا للمنكر يعرفون اني عندي حس ديني
المهم بيتر ذا اخوه مرشح للكنوجرس ويبدأ يكتشف طاقة فيه ويبدا يحلم حلومن ماهي طيبه ويبدأ يحس انه ممكن يطير
طاقته يقدر ياخذ طاقة اي واحد بمجرد ما يركز التفكير فيه

Hayden Panettiere



وتقوم بدور
Claire Bennet
وهي بنت جميله حبيبه طالبة بالثانويه وفي فريق التشيير ليدرز او المشجعات والعياذ بالله
هالبنية متبنيها واحد يعمل في شركة اهتمامها منصب على هالعاهات هاللي عندهم طاقات حيث انهم يمسكونهم يسوون عليهم اختبارات ويحاولون قدر المستطاع انهم يمشونهم على رغبتهم والشركة هذي يملكها شخص غني جدا وصاحب سلطة قوية وغامض جدا اسمه ليندرمان
الزبده بنت الناس دورها مهم جدا بالمسلسل وطاقتها رهيبه
طاقتها : ما تموت ابد لو تصفق فيها لو تكمخها لو تطعنها لو تسوي ما تسوي بنت الناس حقنه وميب ميته والعياذ بالله يعني لو هي زوجتك وتكوفنها كل يوم محد قادر يثبت عليك شي

Masi Oka



ويقوم بدور
Hiro Nakamura
يكاد يكون اطلق شخصيه واكثرها سعه للصدر هالياباني خبل موب صاحي بدا يكتشف طاقته وحس انه بطل ومؤمن ان عنده مهمه لازم ينفذها وسيعة صدر شخصيته بس يسمج لا قلبها جد
كان يعمل في شركة ابوه بطوكيو لما مسكت معه يجيب خويه ويروحون نيويورك عشان يوقف قنبلة بتنفجر هناك
طاقته : يقدر ينتقل من خلال المكان والزمان بس مشكلته صتيمه ميب تزبط معه دايم حلالاة من نقله وطيحه بحضن ابو جهل

James Kyson Lee



ويقوم بدور
Ando Masahashi
صديق هيرو نكامورا الي خذه معه من طوكيو لنيويورك عشانه يعرف انجليزي بثير الله يصلحه ومسوي بطل وهو ما عنده طاقه ضعيف ولا يملك سوى دريشة صغيره وبالانجليزي ويندو يقالك يفزع احيانا بس يجيب العيد اكثر من ما يفزع الله يصلحه

Sendhil Ramamurthy



يقوم بدور
Mohinder Suresh
هالهندي سبحان الله من ابثر ما خلق ربي ...بعد وفاة ابوه مقتولا في نيويورك ينتقل من الهند لنيويورك ليحقق في ابحاث ابوه قبل وفاته والي كانت خاصه بهالعالم الي كل شوي طالعتن لهم طاقات اللهم يا كافي احسن شي انهم ما عطوه طاقه غديه يموت بسرعه ياهو مااااااصل وواثق من نفسه بقوه

JackColeman



ويقوم بدور
Mr. Bennet
هذا الي متبني ذيك البنيه الي قبل شوي ويشتغل في ذيك الشركة الي قبل شوي طبعا يعرف عن طاقه بنيته ويعرف عن غيرها بس عند عائلته وبنته مسوي نفسه سبيكه ما يدري وهو اعوذ بالله مية من تحت تبن ما يخاف الله اجل نعنبوا بليسه يدري عن بنيته ولا يقولها ؟ وين الابوة في هالعصر ؟ وين الأبوة في هالزمان ؟ اصلن نظام التبني هذا غلط نحمد الله ان ديننا الإسلامي حرم هذا النظام الفاسد <=== برضه لمحه دينيه تدل اني فيني خير...الزبده اخينا هذا بعد ما عنده طاقة بس يعرف شلون يتصرف مع اهل الطاقات ويعمل تحت امرته بعض من اهل الطاقات

AdrianPasdar



ويقوم بدور
Nathan Petrelli
اخينا في الله هذا اخو اول واحد حطيت اسمه بيتر بيتريلي <== خشبه الحبس خمش خشبات وخشبه ... هذا هو مرشح الكونجرس ما تدري تحبه ولا تكرهه الرجال منكر طاقته ولا يبي يعترف فيها عشان انتخباته ما تخرب ويبي يغطي على هالموضوع باللي هي به ويبي يغطي على طاقات اخوه بعد ولا همه شي الا هالكونجرس وحاطه فوق كل اعتبار ..شخصيته لها ابعاد كثيره ولها ليله خميس اكثر.. طاقته انه يقدر يطير تقل صاروخ باتريوت والعياذ بالله

Ali Larter



شوفو لا اله الا الله هالزينه بسبب صراع الحضارات يطلع اسمها علي هذي لو تدري ان سميها علي ابراهيم ممثلنا المخضرم وش بتسوي تصوروا زينب العسكري يطلع اسمها ايدي العسكري <== على وزن ايدي ميرفي
<== ترا اتلا علمي بالخليجيات زينب العسكري والظاهر ما طلع وجه جديد عقبها الا لطيفه المجرن لأن كل هاللي بالساحه الخليجيه من الوطن العربي الله يحفظهم بس يجدن اللهجة الخليجية وعمليات التنفيخ
المهم بنت هالناس تقوم بدور
Niki Sanders
وهي ام لطفل تقدر الحياة الزوجية خخخخخخ رجلها خال مسجون هي ورجلها وطفلها كلهم عندهم طاقات ودرايش
هي طاقتها ان لها اختها جيسيكا كل شوي تاخذ شخصيتها اذا هالبنيه تحولت لجيسيكا فعز الله انها اداة قتل محد يوقفها بشخصيه جيسيكا تطلع ترووووووع ودايم في صراع بينها وبين اختها ويتكلمون اذا شافوا بعض بالمرايه لحسه وضعهم
اتصور لو سواها اخوي مشاري فيني احس اني منيب مكلمه اذا شفته بالمرايه احس أني سوف أبصق على المرايه بدون تفاهم

طاقتها زي ما قلت لكم سابقا تطلع قاتله محترفه اذا سيطرت عليها اختها

Noah Gray Cabey



ويقوم بدور
Micah Sanders
وهو ولد هالمذكوره اعلاه وامه تحبه مره وابوه يحبه مره وعاشوا في تبات ونبات وخلفوا قراطيس ومعلبات
هالولد طاقته بإختصار انه ممكن يخلي اي شي الكتروني يشتغل بحسب رغبته اي شي مقفل الكتروني يفتحه اي شي خربان يصلحه نت ما نت ما يعووق معه يعني يعني ما يعووق معه
اطلق هكر

Greg Grunberg



ويقوم بدور
Matt Parkman
وهو ولا شك من اسبك الشخصيات الي انتجتها شاشات التلفاز
وهو يشبه واحدن من العيال يقاله ابو شلاخ والله ياهو هو الخالق الناطق موب بالشكل بس حتى سبحان الله بالسباكه لكن هل هو كذاب مثله ؟ هل سبق ولعبت هالشخصيه بلوت مع ابو فهد؟ هل سبق وحمل شنطة من نوع ( سنسوداين ) ؟ الله اعلم هذا في علم الغيب ...المهم ان هالرجال ضابط شرطة عادي بدا يحس بطاقته ألا وهي الاستماع الى افكار الناس يعني كنه السدحان بحلقة طاش ذيك ويقال ان سباكه الشخصيه مقتبسه من سباكه السدحان

Leonard Roberts



هالأسمر الحليوه يقوم بدور
D.L. Hawkins
زوج علي ههههههههههههه وابو ولدها وهو مسجون بتهمة القتل وطاقته رهيبه يقدر يخش من الجدران <== يا رجال من شفته خال وانا داي ان ذي قاطته طاقة جن ذي ميب طاقة اوادم حتى بالماريه يقولك طاقته ما تشتغل الا وهو معلي الصوت على شاب الشعر يا عبيد

Zachary Quinto


ويقوم بدور
Sylar
وعلى الرغم من ضعف البنيه الجسمانيه لهلممثل لعصقوول جدا .. الا انه مأدي دوره بكل براعه فهو علّه وناشبن في حلووودز خلق الله وشخصيته شخصيه واحد يكره ويحتقر اي شخص خايف من الطاقه الي يملكها او يبي يتخلص منها وهو طبعا طاقته تساعده فيروح لهالي عندهم طاقات ويتصيدهم واحد ورى الثاني يحفر جمجمته هاللي ما يخاف الله ويسحب الطاقة من الدماغ
من افضل شخصيات المسلسل واكثرها إثاره شخصيته فيها تناقضات بالهبل


--------------------------------------------------------------------------------

هذي طبعا اهم الشخصيات فيه شخصيات ثانيه كثير بعضها بطاقات وبعضها بدون
فيه الي يختفي وفيه الي عنده طاقة نووية وفيه الي يمسح الذكريات والميموري وفيه الي يمسح المذر بورد وفيه الي عنده قدرة الاقناع وفيه الي يقدر يتشكل بأي شكل تبغاه وفيه الي يقدر يرسم المستقبل
لكن بصوره عامه هذي اهم الشخصيات
والقصه معقده شوي واخاف اقولها واخرب فوق ما انا مخرب بشرح الشخصيات
المسلسل مثير جدا وحلو بصراحه
تقييم المسلسل قوي للي يعتمدون على التقييم في متابعتهم لأي شي
المسلسل ترشح لجوائز عديده اهمها الإيمي
يعيب على المسلسل انك ان ما شفت حلقه ممكن ينلحس مخك وتضيع عليك باقي السالفه

شكرا بس قاعد اقرا اتحمست اني اتفرج الفيلم وشكرا

طيــب جيـب الفلــم تحمسـنآ علـى آلفـآآضـي

مشكووووور وماقصرت بس يليت نشوف كمان بريزن بريك